Os heroes e heroínas que nos fixeron pensar

Esta mañá tivemos unha visita sorpresa que nos deixou coa boca aberta: pola porta da aula apareceron dúas persoas cunha máscara de Iron Man e outra de Spiderman. Así comezou unha actividade moi especial organizada por Carolina e Daniel,  nai e pai de Antonella respectivamente, moi ligada co proxecto do cole sobre o cómic.

A través dun interesante percorrido polos universos de DC e Marvel, mergullámonos no mundo dos superhéroes e superheroínas que tantas veces vemos. Faláronnos de personaxes tan coñecidos como Batman, Superman, Spiderman, Wonder Woman, Iron Man ou Capitá Marvel, entre moitos outros. Descubrimos a súa orixe, os seus superpoderes, e tamén as misións que cumpren para salvar o mundo.

Unha das partes máis importantes foi cando nos fixeron reflexionar sobre as dificultades cotiás que tamén teñen estes personaxes, moitas delas parecidas ás que vivimos nós:

• A perda dun ser querido, como lle pasou a Batman.

• O sentido da responsabilidade, que sente Spiderman.

• A presión por querer chegar a todo, como lle ocorre a Superman.

• A necesidade de traballar en equipo e aceptar axuda.

• As amizades que seguen camiños diferentes.

• E, sobre todo, o sentir que un é diferente, pero tamén aprender a aceptarse e ser aceptado, como lle pasa a moitos heroes.

Por último, deixáronnos ollar cómics orixinais, algúns deles xa antigos e moi ben coidados. Foi impresionante poder ver as viñetas, os debuxos e mesmo os diálogos en versións auténticas. Para moitos e moitas de nós era a primeira vez que tiñamos un cómic deste tipo nas mans.

Foi unha sesión marabillosa. Moitas grazas a Carolina e a Daniel de parte de todo 5ºA!