Aprendendo a comer con sentido común

Este venres tivemos a sorte de recibir na aula unha visita moi especial: as nais de Antonella e Roi, profesionais do ámbito da química e da alimentación, viñeron compartir con nós os seus coñecementos sobre nutrición. Grazas á súa formación e profesión, puideron explicarnos, dun xeito claro e entretido, aspectos fundamentais para aprender a alimentarnos mellor.

Comezamos analizando etiquetas de produtos que nós mesmos levamos da casa. A partir delas, fomos descubrindo os ingredientes, a información nutricional, e como interpretar datos coma o contido en azucres, graxas ou aditivos. Tamén falamos das recomendacións de organismos coma a OMS en canto ás cantidades recomendadas de inxesta de azucres ou sal ao día, sempre cun enfoque baseado no sentido común.

Outro punto moi interesante foi o do marketing: como os envoltorios, os nomes ou mesmo as cores dos envases poden influír na nosa percepción dun alimento, facéndonos crer que é máis saudable do que realmente é. A palabra “natural” ou imaxes de froitas non sempre queren dicir que o produto sexa bo ou equilibrado, e agora xa sabemos como identificar estes pequenos “enganos”.

Iso si, non se tratou de demonizar ningún alimento. O que aprendemos é que o importante é ser conscientes do que comemos e saber medir as cantidades en función da calidade do produto. Non se trata de prohibir, senón de elixir con información e criterio.

Foi unha sesión moi enriquecedora, onde aprendemos cousas que nos axudarán a tomar mellores decisións na nosa vida diaria. 

Grazas a Eva e Carolina pola súa colaboración e por axudarnos a poñer en práctica a idea de que “somos o que comemos”… pero tamén o que sabemos do que comemos.